28-03-2015, 09:47 - Admin-1 - Город Навои

Навоий вилоят ҳокимлигида яқинда бўлиб ўтган аппарат йиғилишида вилоятда ободонлаштириш, кўкаламзорлаштириш, кўчат экиш масаласи атрофлича кўриб чиқилиб, таҳлил этилди ҳамда  барча учун бу масала асосий вазифалардан бири қилиб қўйилди. Жонажон республикамиз бўйлаб кенг қулоч ёзган мустақилликнинг 24 йиллигига ҳар бир киши 24 та дарахт экиш ҳаракати Зарафшон ва Навоий шаҳрида ҳам давом этмоқда. айниыса Зарафшон шаҳри марказида, Мурунтов қўрғончаларида иш жуда яхши ташкил этилган. Ана шу хайрли ишга шаҳардаги "Кимёгар” маҳалла фуқаролар йиғини ҳудудида яшовчи аҳоли ҳам жуда жиддий ёндошиб, шаҳардаги бошқа маҳаллаларга намуна бўлса арзийдиган ташкилотчилик ишларини бажариб келмоқда. Жорий йил баҳор мавсумида 1500 дона манзарали, 500 дона мевали дарахат кўчатлари ўтказилди. Ҳудуддан 8 тоннадан ортиқ турли чиқиндилар олиб чиқиб кетилди. Биргина шу маҳаллада жойлашган ётоқхона олдига янгидан 155 дона турли хил дарахтлар экилди, гул кўчатлари экилиб, парвариш қилинмоқда. Ўктам Мирзаев оқсоқоллик қилаётган ушбу маҳаллада ободонлаштириш ва кўкаламзорлаштириш масаласи "Экология ва табиатни муҳофаза қилиш, ободонлаштириш, кўкаламзорлаштириш” бўйича жамоатчилик комиссияси йиғилишида кўриб чиқилиб, муҳокама этиб борилади.  Раиснинг ташкилотчилигида бу тадбирга ҳудуддаги яшовчи барча аҳоли ва ташкилотлар кенг жалб этилмоқда. Маҳалла ҳудудида жойлашган "Навоийазот” акциядорлик жамияти, иссиқхона жамоаси ҳамда  аҳоли кучи билан йўл ёқалари, бекатлар атрофи ва хиёбонларга сосна ва ел кўчатлари экилди.

Аммо бир хил шароит ва бир хил ҳудудда жойлашган "Хончарбоқ” маҳалла фуқаролар йиғинида эса ана шу хайрли тадбирга юзаки ёндошилаётганини кўриш мумкин. Шаҳар "Маҳалла” хайрия жамоат фондига тақдим этилган маълумотларда 800 дан ортиқ дарахтлар экилди, деб ахборот берилган бўлса-да, аслида эса ана шу кўрсаткичнинг 10 фоизи миқдорида ҳам иш бажарилмагани ачинарли ҳолдир. Бундай ҳолни бошқа маҳаллаларда ҳам кўриш мумкин.Баҳорнинг март ва апрель ойлари ободонлаштириш ва кўкаламзорлаштириш ойлиги эканлигини ҳаммамиз биламиз, фурсатни бой бермасдан нафақат ўзини ўзи бошқариш органлари эмас,  балки ташкилот ва корхоналар, ҳар бир хонадон эгалари имконият даражасида кўчат экиб, ўзларига тегишли бўлган ҳудудларни тартибга келтирсалар, шаҳримиз ободончилиги ривожига ҳисса қўшган бўлинар эди.