Президент Навоийдаги ўзгаришлардан қониқдими?

Президентимиз Шавкат Мирзиёев ўтган йил 28 март куни Навоий вилоятига  ташриф буюриб, ҳудуднинг ижтимоий-иқтисодий ривожланиш жараёнлари билан танишган эди. Шунингдек, бир қатор лойиҳаларни кўздан кечириб, уларнинг изчил ижросини таъминлаш зарурлиги борасида мутасаддиларга топшириқлар берганди.

Давлат раҳбари мазкур ташрифдан бир йил ўтиб, 2 март куни Навоий вилоятида бўлди ва жойларда амалга оширилаётган бунёдкорлик ишлари, олиб борилаётган ислоҳотлар жараёни, йирик лойиҳалар билан танишди.

Президент дастлаб, Кармана туманидаги “Karmana golden eggs” масъулияти чекланган жамиятида бўлди. Ўтган йил фаолиятини бошлаган корхонада 50 та иш ўрни яратилган. Мажмуада жўжа уч ой давомида парваришланиб, тухум берадиган товуқ ҳолида сотувга чиқарилади. Бу ерда 2019 йилда инкубация, тухум етиштириш комплексларини ишга тушириш режалаштирилган.

– Паррандачилик бўйича тизим яратилибди, – деди Президент. – Энди бу ерда тухум етиштириш ва уни экспортга чиқаришни йўлга қўйиш лозим.
Президент мазкур мажмуа фаолияти билан танишишгандан сўнг, “Навоий” эркин иқтисодий зонасида истиқболдаги режалар тақдимотида бўлди. Унга кўра, 2017-2019 йилларда 32 та лойиҳа амалга оширилиб, 1659 та иш ўрни яратилади. Бунда электротехника, фармацевтика ва тиббий буюмлар, машинасозлик ва автомобилсозлик, қурилиш материаллари, кимё ва нефть кимёси маҳсулотлари ишлаб чиқариш кўзда тутилган.

– Навоий вилоятида иқтисодий лойиҳаларни амалга ошириш учун барча имкониятлар мавжуд, – деди Президент. – Бу имкониятлардан унумли фойдаланиш учун ташаббускор тадбиркорларни топиш керак. Бунинг учун яқин вақтда вилоятда бизнес-форум ташкил қилиш лозим. Унга чет эллик инвесторларни ҳам жалб қилиш мақсадга мувофиқ бўлади. Ана шунда Навоийга энг сара инвесторлар келади.

Шу ернинг ўзида давлат раҳбари Зарафшон шаҳрида шиша маҳсулотлари ишлаб чиқариш, Кармана туманидаги хонадонларда кичик сув ҳавзалари барпо этиб, интенсив усулда балиқ етиштириш, Нурота туманида 10 минг гектар лалми ерда интенсив писта плантациялари ташкил этиш, Хатирчи туманида боғ ва замонавий иссиқхона барпо этиш, мева-сабзавотни қайта ишлаш, Навбаҳор туманида томчилатиб суғориш усулида бодом ва писта плантациялари очиш, қоракўлчилик, тивит жунли эчкиларни кўпайтириш лойиҳалари билан танишди

Ташриф  давомида Президент Томди туманида ҳам бўлди. Тумандаги 12-болалар мусиқа ва санъат мактабида Томди, Учқудуқ, Конимех туманлари ва Зарафшон шаҳрини комплекс ривожлантириш чора-тадбирлари ҳақида маълумот берилди.

Хусусан, Учқудуқ туманида жунни қайта ишлаш ва тайёр маҳсулот ишлаб чиқариш, Конимехда гидропоника усулида иссиқхона қуриш, Зарафшон шаҳрида йилига 4,5 минг тонна арматура ишлаб чиқариш, Конимех туманида туячилик мажмуаси, Томди туманида 4 минг бош қўй боқишга мўлжалланган чорвачилик комплекси барпо этиш ишлари олиб борилмоқда.

Шавкат Мирзиёев шу ерда Томди, Учқудуқ, Конимех туманлари ва Зарафшон шаҳри жамоатчилиги вакиллари, оқсоқоллар, ёшлар, тадбиркорлар билан мулоқот қилди.

Шу куни Хатирчи тумани ҳокимлигида вилоят фаоллари иштирокида йиғилиш бўлиб ўтди. Унда вилоят иқтисодиётини юксалтириш, одамлар турмуш шароитини яхшилаш, янги иш ўринлари яратишга эътиборни кучайтириш, таълим, тиббиёт ва бошқа соҳаларда бошланган ислоҳотларни изчил давом эттириш, аёллар ўртасида жиноятчиликни камайтириш каби қатор долзарб масалалар муҳокама қилинди. Президент одамларнинг муаммо ва таклифларини эшитиб, мутасаддиларга уларни қисқа фурсатларда бартараф этиш бўйича тегишли топшириқлар берди. 

Шу билан Президент Шавкат Мирзиёевнинг Навоий вилоятига ташрифи якунига етди.

 


Понравилась статья? Жми лайк или расскажи своим друзьям!

Комментарии

  • #302 Фируза

    03.03.2018

    Урток журналист,"жунни"эмас "юнгни"кайта ишлаш булади!Навоий вилоятимизга баркамоллик ва янада ривож тилаб коламан!

  • #312 Нурали

    02.04.2018

    Хурматли Ферузахон журналистлар "юнгни" эмас, "жун" деб тугри ёзишган.