Қизилқум ғунчалари

апрел 06, 2016   - 0 +

Тинч, омон, фаровон элдагина болаларнинг шодон кулгиси янграйди, жажжи қалблар санъат, адабиёт каби эзгулик нуридан баҳраманд бўлиб, вояга етадилар. Зеро, мусиқага, куй-қўшиққа ошно кўнгилларда меҳр-оқибат туйғулари эрта шаклланади, Ватанга муҳаббат, садоқат каби ғоялар келажак авлоднинг мустаҳкам пойдеворига айланади. Ҳукуматимиз томонидан эртамиз умиди бўлган ёш авлодга кўрсатилаётган ғамхўрлик, ёшларнинг санъатга, спортга бўлган қизиқишларини қўллаб-қувватлаш улкан имкониятлар эшигини очиб бермоқда.

Навоий кон-металлургия ком­бинати томонидан 13 йилдан буён анъанавий тарзда ўткази­лаётган "Қизилқум санъат ғун­чалари" фестивали ҳар йили минглаб ўқувчи ёшларнинг санъат байрамига, дўстлик тантанасига айланади. Унда комбинатнинг "Олтин водий", "Учқудуқ", "Нуробод", "Ёшлик", "Наврўз", "Кончи", "Шодлик" ва "Фарҳод" маданият уйлари­нинг ижодий жамоаларида таҳсил олаётган 5 ёшдан 14 ёшгача бўлган ёшлар иштирок этиб келмоқда.

Жорий йилдаги фестиваль республикамиз давлат муста­қил­лигининг 25 йиллиги ҳамда "Соғлом она ва бола йили"га бағишланди. Тантанада 600 на­фардан ортиқ ўқувчи ёш санъ­атнинг рақс, миллий куй-қў­шиқлар, доира, най, фортепь­яно, пианино ва бошқа жанр­ларида баҳслашиш учун йи­ғилди.

Навоий шаҳрининг "Фарҳод" маданият саройида фестивал­нинг тантанали очилиш маро­сими бўлиб ўтди. Карнай-сур­най садолари остида кириб кел­ган жамоалар ижодий қо­билиятини синовдан ўтказиш­ди. Биринчи бўлиб намойиш этиш имконияти Зарафшон мада­ният уйи хонандаси Тах­мина Асилхоновага насиб этди.

Фестивалнинг биринчи бос­қи­чида якка ижро, дуэт, фольк­лор гуруҳлари, доирачи­лар ан­самбллари ва оркестр чиқиш­ла­ри кузатилди. Саҳна­да ўз қо­билиятини намойиш этиш иста­ги жажжи қалблар­га ўзгача илҳом бағишлади. Кўзларида эртанги кунга умид ва ишонч акс этган Тахмина ижросидаги биринчи қўшиқ ҳам Ватанга садоқат, тинчлик ва дўстликни мадҳ этиш би­лан бошланди. Минглаб томо­шабин йиғилган зални титрат­ган, янгроқ овозда куйланган самимий орзулар митти юрак­ларнинг акс-садоси бў­либ жаранглади.

— Зарафшон шаҳридаги "Олтин водий" маданият саройининг ўзида ўндан ортиқ ижодий жамоа фаолият юри­тади, — дейди "Афсона" мил­лий рақс ансамбли балет­мейс­тери Зулайҳо Мамадиё­ро­ва. — Бугунги фестивалда жамоамиз билан "Соз сеҳри" рақсини тайёрлаб келганмиз. НКМК ҳомийлигида нафақат юртимизда, балки халқаро фес­тивалларда ҳам доимий иштирок этаяпмиз. Хусусан, Россия, Украина, Болгария, Бош­қиристонда ўтказилган танловларда ғолиб бўлиб, Гран-прини қўлга киритган бўл­сак, Германияда олтин медаль соҳиби бўлдик.

Вилоятимизда юзга яқин миллат ва элатлар яшайди. Фестивалда турли тилларда куйланган қўшиқлар, ранго-ранг чолғулардан таралган куй ва мусиқалар, халқлар ўрта­сидаги дўстлик ва ҳамжиҳат­лик, ўзаро тенглик ва тотувлик, фаровон кунларнинг шукрона­си сифатида янгради.

— Мен Учқудуқ шаҳридан келдим, — дейди танловнинг яна бир иштирокчиси, "Елес" гуруҳи яккахон хонандаси Эл­ва­ра Тўрейқабулова. — Қў­шиғим орқали қозоқ овуллари,Қизилқумнинг ям-яшил дала­ла­ри­ни куйлайман. Шаҳар мар­казидан олис ҳудудда яша­сак-да, замонавий мусиқа ва спорт мактаблари, яратилган шарт-шароитлар шаҳарники­дан асло қолишмайди. Кўрик-танловда қатнашишдан мақса­дим, кўпроқ дўстлар орттириш, улардан билмаганларимни ўрганиб кетишдир.

Фестивалнинг иккинчи бос­қи­чида рақс жамоалари, вокал ансамбллари танлови бўйича беллашилди. Ижодий чиқиш­лар "Булбулча" ашула ва рақс болалар ансамбли бадиий раҳбари, профессор Шермат Ёрматов, "Ўзбекистон" давлат ансамбли балетмейс­тери, Ўзбекистонда хизмат кўр­сат­ган артист Гулмира Шири­но­ва, Ўзбекистон Республи­ка­си санъат арбоби, Ўзбекистон давлат консерваторияси про­фес­сори, Республика компози­торлар уюшмаси раиси Рус­там Абдуллаев, шунингдек, Санъат ва маданият институти ўқитувчилари, композиторлар уюшмаси аъзолари томони­дан баҳоланиб борилди.

— Навоий вилоятида санъат­га, маданиятга бўлган эъти­бор­нинг кучли эканлигини фес­тивалнинг юқори савияда ташкил этилганида кўриш мум­кин, — дейди ҳакамлар ҳайъа­ти аъзоси Гулмира Ширино­ва. — Бадиий чиқишларда ўқув­чиларнинг ўзига хос иқтидори, образли либоси, саҳна эсте­ти­каси, ижро этиш маданияти яққол сезилиб турди. "Ширин", "Марварид", "Афсона" рақс ансамблларининг чиқишлари юқори баҳоланди. Санъатсе­вар ёшларнинг қўллаб-қувват­ланаётгани келгусида улар­нинг қизиқишлари учун катта замин бўлиб хизмат қилади.

Беш кун давом этган фести­валь чинакам дўстлик байра­мига айланди. Ҳакамлар ҳайъ­а­ти томонидан ҳар бир жамоа­нинг ижодий салоҳиятига ало­ҳида эътибор қаратилди. Асо­сий мукофот — Гран-при насиб этган "Сардоба қалдир­ғочлари" фольклор-этнографик жамоаси, "Адреналин", "Ширин" рақс дас­та­ла­ри, "Ниҳол" ўзбек халқ чол­ғу оркестри, "Садо" доира­чилар ансамбли чиқиш­лари кўпчилик­ка манзур бўл­ди. НКМК меҳнат­кашлари учун ташкил этилган катта концерт дастури барчага кўтаринки кайфият, қувончли онларни тақдим этди.


 

Мақолани ижтимоий тармоқларда тавсия ёки нашр қилиш учун
Ҳурматли меҳмон, Сиз веб-сайтга рўйхатдан ўтмаган фойдаланувчи сифатида кирганингиз учун Биз Сизга
рўйхатдан ўтишингизни ёки илгари рўйхатдан ўтган логинингиз орқали киришингизни тавсия қилардик.
 

Шарҳ қўшиш шакли

Сизнинг электрон манзилингиз очиқ ошкор этилмайди. Мажбурий тўлдириш керак бўлган қаторлар * билан белгиланган.

Полужирный Наклонный текст Подчеркнутый текст Зачеркнутый текст | Выравнивание по левому краю По центру Выравнивание по правому краю | Смайликларни қўйиш Картинка Выбор цвета | Скрытый текст Вставка цитаты Преобразовать выбранный текст из транслитерации в кириллицу Вставка спойлера