AICA bilan hamkorlikda kelajakni quramiz!

     AICA – Markaziy Osiyoda sun’iy intellekt sohasida yetakchi mintaqaviy platforma bo‘lib, O‘zbekiston, Qozog‘iston, Qirg‘iziston va Tojikistondagi SI mutaxassislari, startaplar, ilmiy jamoalar, investorlar hamda IT kompaniyalarini birlashtiradi.

     Ushbu hamkorlik orqali o‘quv markazimizda sun’iy intellekt sohasidagi ta’lim sifati yanada oshiriladi. O‘quvchilar zamonaviy loyihalarda ishtirok etish, mintaqaviy tadbirlarda qatnashish, real SI loyihalarini amalga oshirish imkoniyatiga ega bo‘ladi.

     AICA bilan hamkorlik – nafaqat yangi imkoniyatlar, balki kelajak innovatorlarini tayyorlashdagi mas’uliyatdir.
Birgalikda Markaziy Osiyoda sun’iy intellekt rivojlanishiga o‘z hissamizni qo‘shamiz!

   AICA tashkiloti – O‘zbekiston, Qozog‘iston, Qirg‘iziston va Tojikistonda faoliyat yurituvchi SI mutaxassislari, startaplar, ilmiy jamoalar, investorlar hamda IT kompaniyalarini birlashtiruvchi mintaqaviy platforma sifatida faoliyat olib boradi.

     AICA nima uchun mavjud?

AICA maqsadi – Markaziy Osiyoda barqaror, rivojlangan sun’iy intellekt ekotizimini yaratish. Buning uchun ta’lim, startaplar, moliya, qonunchilik, investitsiyalar, hamjamiyatlar va ilg‘or texnologiyalar sohasidagi mutaxassislarni birlashtirish orqali mintaqaviy hamkorlikni mustahkamlash ko‘zda tutilgan.
AICA nafaqat sohani rivojlantirish, balki mintaqaning tarixiy, madaniy va iqtisodiy aloqalarini yangi texnologiyalar asosida yanada mustahkamlashni ham maqsad qilgan.

     2030-yilgacha bo‘lgan strategik maqsadlari:

• 1 million kishini sun’iy intellekt bilan ishlash va uning xavfsiz, axloqiy jihatlari bo‘yicha o‘qitish.

• 100 ta Senior va 500 ta Middle darajadagi dasturchilarni SI sohasida mutaxassislar darajasiga yetkazish.

• Markaziy Osiyodagi 1000 ta kompaniyani AICA a’zosi (rezident) sifatida birlashtirish.

• Iqtisodiyotning 12 ta asosiy sohasiga sun’iy intellekt texnologiyalarini joriy etish.

• AICA tashkil etadigan tadbirlarga 100 ming kishidan ortiq insonni jalb qilish.

     Asosiy loyihalari:

     SI laboratoriyalari yaratish
TIFT, Inha, Amity, New Uzbekistan University, Turin kabi O‘zbekistonning yetakchi universitetlarida talabalar uchun maxsus sun’iy intellekt laboratoriyalari tashkil etilmoqda. Bu yerda yosh innovatorlar real loyihalar ustida ishlaydi, ilmiy-tadqiqot ishlarini amalga oshiradi.

     "UzbekVoiceCorpus" – ochiq ma’lumotlar bazasi
O‘zbek tilida sun’iy intellekt modellarini o‘qitish uchun bepul, ochiq va litsenziyasiz ovozli hamda matnli ma’lumotlar bazasi yaratilmoqda. Bu – o‘zbek tilida so‘zlashuvchi aqlli vositalar, botlar va asistentlar yaratish uchun asosiy resurs.

     SI orqali ta’lim
Barcha darajadagi foydalanuvchilar – boshlang‘ich darajadagilardan mutaxassislargacha – uchun sun’iy intellekt bilan ishlash, uning amaliy qo‘llanilishi, xavfsizligi va axloqiy jihatlari bo‘yicha o‘quv kurslari ishlab chiqilmoqda.

     Kompaniyalarga qo‘llab-quvvatlash dasturi
Kompaniyalarga bepul biznes auditlari o‘tkaziladi, ularning ish jarayonlari tahlil qilinadi va sun’iy intellektni qayerda qo‘llash maqsadga muvofiq bo‘lishi aniqlanadi. Rezident kompaniyalar SI mutaxassislari, investorlar, huquqiy va moliyaviy maslahatlar bilan tanishish imkoniyatiga ega bo‘ladi.

     O‘zbekiston Oliy sudi bilan hamkorlik
Fuqarolarning murojaatlarini avtomatlashtirish, sudyalarga qaror qabul qilishda yordam beruvchi sun’iy intellekt tizimlarini joriy etish orqali adolat tizimining sifatini oshirish rejalashtirilgan.