"Orzularini kodga aylantirayotgan " — yosh dasturchi.

     Men — Otabek Ibodillayev. Hozirda 15 yoshdaman va 6-umumiy o‘rta ta’lim maktabida o‘qiyman  hali yoshman, lekin shunga qaramay, o‘z yo‘limni aniq topganman — bu yo‘l texnologiya va dasturlash yo‘li.

     Dasturlashga bo‘lgan qiziqishim bejiz paydo bo‘lmagan. Men ko‘plab mashhur dasturchilar va texnologiya sohasidagi buyuk insonlarning muvaffaqiyatli hayotlarini ko‘rib, ilhom oldim. Ayniqsa, ularning hech narsadan boshlagan holda dunyoni o‘zgartirganlari meni hayratga solgan. Shu paytdan boshlab o‘zimga shunday savol berdim: “Agar ular uddalagan bo‘lsa, nega men ham urinib ko‘rmayman?”

     Shu fikr meni dasturlash dunyosiga olib kirdi va men "SENSORIKA - IT o'quv markaziga keldim. Avvaliga Frontend yo‘nalishini o‘rgandim va kursni tugatganimdan so‘ng o‘z saytimi yaratdim. Bu men uchun juda katta motivatsiya bo‘ldi — o‘zim yozgan kodlar natijasida biror narsa paydo bo‘lishi, o‘sha narsa jonlanib ishlay boshlashi meni o‘zgacha his-tuyg‘ular bilan to‘ldiradi.

     Hozir esa Python dasturlash tilini o‘rganmoqdaman. Dasturlashni faqat nazariya sifatida emas, amalda ham tatbiq qilmoqdaman. Bir-biridan ajoyib Telegram botlar yaratish orqali o‘rganayotgan bilimlarimni real loyihalarga aylantirayapman. Har bir yangi bot, har bir kod satri men uchun yangi bosqich — bu orzular sari qo‘yilgan yana bir qadamdir.

     Eng katta orzularimdan biri — o‘zimning shaxsiy katta kompaniyamni ochish va o‘sha kompaniya tomonidan yaratilgan insonlarga foyda keltiradigan, hayotni yengillashtiradigan ilovani dunyoga taqdim etishdir. Men shunchaki mashhur bo‘lishni emas, balki foydali bo‘lishni istayman. Chunki haqiqiy dasturchi — bu boshqalarning muammosini hal qila oladigan inson deb hisoblayman.

     Menga eng ko‘p ilhom beradigan shaxslar — Stiv Jobs, Elon Musk va Pavel Durov. Ularning ichida esa Stiv Jobs mening eng katta ilhom manbaim. Uning “Dunyoni o‘zgartirish mumkin” degan fikri menga ham ishonch beradi. Men ham bir kun kelib o‘z yo‘lim bilan dunyoga ijobiy ta’sir ko‘rsatishimga ishonaman.

     Bo‘sh vaqtlarimda esa faqat kod yozmayman yangi bilimlarni o‘rganaman, dizaynerlik bilan shug‘ullanaman. Har kuni bir qadam bo‘lsa ham o‘zimni rivojlantirishga intilaman. Chunki men bilaman — bugun kichik qadam bo‘lsa ham, u ertaga katta yutuqqa olib boradi.

Yosh bo‘lishimga qaramay, orzularim katta. Va men bu orzularni bir kun emas, bugundan boshlab haqiqatga aylantirmoqdaman.

Shunchaki bitta ishonchim bor — hech narsa imkonsiz emas, agar chin dildan harakat qilsang.