Salom, mening ismim Dilnoza

     Salom, mening ismim Dilnoza. Men 15 yoshdaman va Navoiy shahridagi 1-maktabda o‘qiyman. IT sohasiga bo‘lgan qiziqishim menga bu sohada katta yutuqlarga erishish uchun ilhomlantiradi. Hozirda "Sensorika IT" o‘quv markazida tahsil olyapman va bu yerda o‘qiyotganimga bir yildan oshdi. Ushbu markazda IT sohasida chuqur bilim olish, dasturlash bo‘yicha amaliy tajriba orttirish va real loyihalar ustida ishlash imkoniyatiga ega bo‘ldim.

     "Sensorika IT" o‘quv markazi menga IT dunyosiga kirib borishda zarur bo‘lgan bilimlarni beribgina qolmay, ayni paytda mustaqil ishlash, muammolarni tahlil qilish va samarali yechimlar topish kabi muhim ko‘nikmalarni ham o‘rgatdi. O‘qish jarayonida Frontend dasturlash kursini tamomlab, xalqaro sertifikat oldim. Hozirda esa Python dasturlash tilini chuqur o‘rganmoqdaman, bu til menga backend dasturlash, ma’lumotlar bazalari bilan ishlash va avtomatlashtirish sohalarida rivojlanish imkoniyatini bermoqda.

     Menda Frontend dasturlash bo‘yicha HTML, CSS, jаvascript, React.js, Bootstrap, Tailwind CSS va GitHub bilan ishlash ko‘nikmalari mavjud. Hozirda esa backend va dasturiy ta’minot yaratish bo‘yicha FastAPI, SQLAlchemy va PostgreSQL kabi texnologiyalarni o‘rganmoqdaman. Bu bilimlar menga keng qamrovli dasturiy loyihalarni yaratish va amaliyotda qo‘llash imkonini bermoqda.

     Sensorika IT o‘quv markazidagi kurslar davomida men turli loyihalar ustida ishladim. Ular orasida responsiv veb-saytlar yaratish, foydalanuvchilar uchun qulay interfeyslar ishlab chiqish va mustaqil ravishda Python dasturlash tilida loyihalar ishlab chiqish mavjud. Hozirda Python dasturlash tilida bir nechta qiziqarli loyihalar ustida ishlayapman. Ular orasida FastAPI asosida backend tizimlarini yaratish, Telegram botlarini ishlab chiqish va avtomatlashtirilgan dasturiy yechimlarni yaratish ham bor. Shuningdek, ma’lumotlar bazasi bilan ishlaydigan tizimlar ishlab chiqish bo‘yicha tajriba orttirdim.

Men 2025-yilda ICT4Girls olimpiadasida Python dasturlash tili bo‘yicha qatnashyapman. Ushbu olimpiada men uchun dasturlash sohasida o‘z kuchimni sinash va yangi bilimlar olish imkoniyatini yaratadi degan umiddaman. Bu musobaqada qatnashish, nafaqat bilimlarimni sinovdan o‘tkazishga, balki boshqa yosh dasturchilar bilan tajriba almashish va o‘rganishga yordam beradi deb o'ylayman.

     Mening asosiy maqsadim – dasturlash va IT sohasida chuqur bilimga ega bo‘lish, mukammal dasturiy mahsulotlar yaratish va IT sohasida yuqori darajaga chiqishdir. Kelajakda dasturiy ta’minot muhandisligi va sun’iy intellekt (AI) sohalarini ham o‘rganib, innovatsion loyihalar ustida ishlashni niyat qilganman. Ushbu sohalar, nafaqat texnologik rivojlanish uchun, balki insoniyat hayotini yaxshilash uchun ham katta ahamiyatga ega. Men doimiy ravishda yangi texnologiyalarni o‘rganish, real loyihalar ustida ishlash va IT sohasida professional darajaga chiqishni o‘z oldimga maqsad qilib qo‘yganman. Har bir yangi o‘rganilgan bilim va tajriba, meni kelajakda o‘z maqsadlarimga yanada yaqinlashtiradi va innovatsion sohalarda yuksak yutuqlarga erishishga imkon yaratadi.