Men Zakirova E’zoza,Navoiy Davlat Universiteti Iqtisodiyot fakulteti talabasiman

     Men Zakirova E’zoza, Navoiy davlat universiteti Iqtisodiyot fakulteti talabasiman. Raqamli iqtisodiyot asrida yashar ekanmiz, kompyuter va IT sohasi har bir inson uchun zaruriyatga aylangan. Ayniqsa, iqtisodiyot sohasida tahsil olayotgan talabalar uchun bu bilimlar kelajakdagi kasbiy faoliyatlarida mustahkam poydevor bo‘lib xizmat qiladi. Shu bois men ham axborot texnologiyalarini chuqur o‘rganish, ulardan to‘g‘ri va samarali foydalanishni o‘z oldimga maqsad qilib oldim.

     Men kelajakda bank tizimida buxgalter sifatida faoliyat yuritishni istayman. Shu sababli, IT sohasi va kompyuter savodxonligi mening uchun beqiyos ahamiyatga ega.Hujjat tayyorlash, hisob-kitoblarni avtomatlashtirish, elektron hujjat almashinuvi, moliyaviy dasturlardan foydalanish, hamda internet resurslari orqali kerakli ma’lumotlarni topish — bularning barchasi mening kasbimda muhim o‘rin tutadi.

    Kompyuter savodxonligini o‘rganish jarayonida men nafaqat kasbiy bilimlarimni boyitayapman, balki kundalik hayotimda ham undan unumli foydalanishni o‘rganayapman. Bu bilimlar menga vaqtni tejash, ishni tez va samarali bajarish, kerakli ma’lumotlarni tezkor topish imkonini bermoqda.

    Shuningdek, o‘quv jarayonida ustozlarning sabr-toqati, tushuntirishlari va har bir talaba bilan individual ishlashlari menga katta ilhom bag‘ishladi. Ularning yordami va qo‘llab-quvvatlashi tufayli men o‘zimda yangi maqsadlar qo‘yish va kelajakda yanada samarali ishlash ishonchini hosil qildim.

    Xulosa qilib aytganda, kompyuter savodxonligi – bugungi kun talabi. Men bu bilimlarni egallash orqali nafaqat o‘qishda, balki kelajakdagi kasbiy faoliyatimda ham yuksak muvaffaqiyatlarga erishishimga ishonaman. Axborot texnologiyalari zamonaviy bank va moliya sohasining ajralmas qismi bo‘lgani sababli, bu yo‘nalishda o‘z ustimda tinmay ishlashga katta ahamiyat qaratmoqdaman.